ភ្នំពេញ៖ នាយករដ្ឋមន្ត្រីកម្ពុជា សម្ដេច​ធិបតី ហ៊ុន ម៉ាណែត បានឯកភាពធ្វើជាប្រធានកិត្តិយសនៃមជ្ឈមណ្ឌលជាតិនៃជនពិការតេជោសែន និង​គណៈកម្មាធិការជាតិប៉ារ៉ាអូឡាំពិកកម្ពុជា និងសម្រេចឱ្យបង្កើតមូលនិធិកីឡាជនពិការតេជោសែនផងដែរ។

ថ្លែង​ក្នុងពិធីសម្ពោធសមិទ្ធផលមជ្ឈមណ្ឌលជាតិ នៃជនពិការតេជោសែន និង​គណៈកម្មាធិការជាតិប៉ារ៉ាអូឡាំពិកកម្ពុជាព្រឹកថ្ងៃព្រហស្បតិ៍ ទី២១ ខែមីនា ឆ្នាំ​២០២៤នេះ សម្ដេច​ធិបតី ហ៊ុន ម៉ាណែត បានលើកឡើងថា៖ «ចំពោះការផ្ដល់កិត្តិយសដល់ខ្ញុំបាទជាប្រធានកិត្តិយសនៃមជ្ឈមណ្ឌលជាតិនៃជនពិការតេជោសែន និងគណៈកម្មាធិការជាតិប៉ារ៉ាអូឡាំពិកកម្ពុជាខ្ញុំសូមអរគុណដល់ការផ្ដល់កិត្តិយសនេះ និងសូមទទួលដោយរីករាយ»។

ជាមួយគ្នានេះសម្ដេច​ធិបតី ហ៊ុន ម៉ាណែត ក៏យល់ព្រមក្នុងការបង្កើតកីឡាជនពិការតេជោសែនផងដែរដើម្បីជួយទ្រទ្រង់ដល់មជ្ឈមណ្ឌល និងស្នើដល់ការចូលរួមពីសប្បុរសជនចូលរួមជួយផងដែរ។

សម្ដេចថា៖ «សូមឪ្យរៀបចំលក្ខន្តិកៈឱ្យបានត្រឹមត្រូវដើម្បីរៀបចំប្រសិទ្ធភាពនៃការគ្រប់គ្រងក៏ដូចជាការបង្កើតការទុកចិត្តនិងការចូលរួមគាំទ្រដល់មូនិធិនិនេះ។ អ៊ីចឹងសូមរៀបចំលក្ខន្តិកៈដើម្បីបង្កើត ហើយក្រោយពេលបង្កើតនេះខ្ញុំសូមចូលរួម២០០លានក្នុងមូលនិធិនេះ និងបន្ត១ឆ្នាំ២០០លានក្នុង៣ឆ្នាំបន្តទៀតសរុបបួនឆ្នាំដំបូងក្នុងមួយឆ្នាំ២០០លានតែម្ដង»៕